Fotot e shtypit botëror në ekspozitën e Budapestit. Një këndvështrim i ri mbi botën

Këtë vit, ekspozita e Fotove të Shtypit Botëror është hapur në Muzeun Kombëtar të Budapestit, ku një koleksion interesant fotosh do të mund të shihen nga 22 shtatori deri më 5 nëntor.

Fotot më të mira të stilit gazetaresk dhe dokumentar të vitit të kaluar, 94 në total, u përzgjodhën nga një juri mes 60 mijë e 448 fotosh, të realizuara nga 3 mijë e 752 fotoreporterë.

“Aplikantët duan të fokusohen në histori konstruktive. Ne shohim shumë gjëra të shëmtuara që ndodhin në botë, ngjarje të tmerrshme, por gazetaria konstruktive fokusohet tek zgjidhjet e këtyre dukurive, si për shembull tek beteja për ndryshimet e klimës”, thotë Marika Cukrowski, kuratore e ekspozitës.

Ekspozita e lëvizshme vizitohet nga rreth 4 milionë persona në 70 qytete të 30 vendeve. Në vitet e fundit, ekspozita e Budapestit ka qenë ndër më të vizituarat në botë.

“Kushdo që sheh këto foto do të marrë informacion se si është bota. Është e pamundur të mos mendosh se çfarë ndodh në të. Do të mësoni shumë dhe shpirti juaj empatik do të zhvillohet më shumë”, shprehet Tamas Revesz, organizator i ekspozitës.

Fotot e udhëheqin vëmendjen e vizitorëve tek dukuri të rëndësishme globale, që variojnë nga ato sociale tek ato ambientale, duke provokuar këndvështrimin e tyre për botën që e rrethon.

Sipas vlerësimeve të organizatës Reporterët pa Kufij, thuajse gjysma e popullsisë së botës nuk ka akses në lajmin dhe informacionin e lirë. Eventi Fotoja e Shtypit Botëror mbështet lirinë duke paraqitur pamjet më të mira të realizuara nga shtypi.

LEXONI GJITHASHTU:

• “Rinacimento” e Arben Golemit, ekspozita e ardhshme në New York
• Java e Kulturës Italiane, çelet ekspozita ‘Mbi gjurmët e italianëve në rajon’