Franca i jep avionë Ukrainës, zotohet Macron: Ka të drejtë të mbrojë tokën e saj

Presidenti Emmanuel Macron ka deklaruar se Franca do të pajisë Ukrainën me avionët luftarakë “Mirage”, për të ndihmuar vendin në përballjen me Rusinë.

Macron foli pasi homologu ukrainas Volodymyr Zelensky u bashkua me liderët botërorë në Francë për të përkujtuar 80-vjetorin e zbarkimit të aleatëve.

“Nesër ne do të nisim një fazë të re bashkëpunimi dhe do njoftojmë transferimin e avionëve luftarakë “Mirage”, që do t’i mundësojnë Ukrainës të mbrojë tokën dhe hapësirën e saj ajrore. Po nesër do të nisim një program për trajnimin e pilotëve”, tha Emmanuel Macron.

Pasi konfirmoi stërvitjen e pilotëve ukrainas, Macron theksoi se Ukraina duhet të lejohet të përdorë armët e ofruara nga perëndimi për të goditur objektivat rusë.

Holanda dhe Danimarka premtuan vitin e kaluar se do t’i jepnin Ukrainës avionë “F-16” dhe Shtetet e Bashkuara po i stërvisin pilotët ukrainas në Arizona.

Premtimi i Macron ka gjasa të mirëpritet në Kiev. Aktualisht, Ukraina po lufton për të zmbrapsur një ofensivë të re ruse në zonat lindore, përfshirë rajonet kufitare të Kharkivit dhe Donjeckut.

LEXONI GJITHASHTU:

• Putin: Përdorimi i armëve gjermane nga Ukraina kundër Rusisë është hap i rrezikshëm
• Putin: Rusia mund të përdorë armët bërthamore nëse kërcënohet