Franca miraton rezolutën: I kërkon BE-së të shpallë “Wagner” grup terrorist

Parlamenti francez ka miratuar një rezolutë që i bën thirrje Bashkimit Evropian ta shpallë grupin e mercenarëve “Wagner” si “grup terrorist”.

Rezoluta, që nuk është imponuese, u miratua unanimisht nga i gjithë spektri politik. “Kudo që shkojnë, anëtarët e “Wagner” shkaktojnë destabilitet dhe dhunë”, deklaroi ligjvënësi francez Benjamin Haddad.

Presidenti ukrainas falënderoi Parlamentin francez për rezolutën.

“Shumë faleminderit Parlamentit francez për vendimin që njeh grupin “Wagner” si organizatë terroriste. Është diçka që duhet të miratohet nga e gjithë bota. Çdo formë e terrorizmit duhet të shkatërrohet dhe çdo terrorist të dënohet”, tha Zelensky.

Më herët gazeta “The Times” raportoi se edhe Britania po bëhet gati ta shpallë kompaninë ruse të mercenarëve si “organizatë terroriste” për të rritur presionin ndaj Rusisë.

Ndërsa Departamenti amerikan i Thesarit e ka cilësuar kompaninë si një “organizatë kriminale ndërkombëtare” dhe më 26 janar vendosi sanksione ndaj rrjetit të mbështetësve të saj.

Ndërkohë, prej disa vitesh themeluesi i “Wagner”, Jevgjeni Prigozhin dhe anëtarët e familjes së tij janë sanksionuar nga një numër vendesh, përfshirë Shtetet e Bashkuara, Britaninë dhe Ukrainën.

LEXO GJITHASHTU:

• Ukraina përgatit kundërofensivën, vullnetarët në ndihmë të ushtrisë
• Shefi i Wagner akuzon ushtarët rusë se po ikin nga Bahmuti