Frikë nga rrjedhja radioaktive në Zaporizhia, ukrainasit nisin shpërndarjen e jodit

Autoritetet ukrainase nisën shpërndarjen e tabletave të jodit për banorët pranë centralit bërthamor të Zaporizhias, në rast të një rrjedhjeje të mundshme radioaktive, mes frikës në rritje se luftimet rreth impiantit mund të shkaktojnë një katastrofë bërthamore.

Tabletat e jodit ndihmojnë në bllokimin e përthithjes së radioaktivitetit nga gjëndra tiroide në rastin e një aksidenti bërthamor.

Vendimi erdhi një ditë pasi centrali u fik përkohësisht për shkak të asaj që zyrtarët thanë se ishte dëmtim nga zjarri në një linjë transmetimi.

Incidenti rriti frikën për një katastrofë bërthamore në një vend ende të përndjekur nga shpërthimi i vitit 1986 në Çernobil.

Bombardimet e vazhdueshme u raportuan në zonë gjatë natës dhe imazhet satelitore nga “Planet Labs” treguan zjarre që digjeshin rreth centralit bërthamor më të madh në Evropë.

Evropa u përball me rrezikun e një katastrofe radioaktive pasi centrali bërthamor i Zaporizhias, i kontrolluar nga rusët, u shkëput nga rrjeti energjetik ukrainas.

Një zjarr që ra në afërsi të perimetrit të impiantit dëmtoi linjat elektrike të rrjetit dhe bëri që të fikeshin dy reaktorë.

LEXONI GJITHASHTU:

• Inspektimi i impiantit bërthamor mund të rivendosë sigurinë, thotë Zelenski
• Zelenski vijon shkarkimet në Shërbimin e Sigurisë së Ukrainës