Fundjava e kulturës, një tur se çfarë mund të shijojmë këtë fundjavë në vend

Kjo fundjavë sjell shije të artit pamor, me disa ekspozita të çelura në kryeqytet, secila unike, e që nxit një bashkëbisedim personal, sepse arti nuk mund të kuptohet ndryshe.

Rrëfimin e kësaj jave të Kultit do ta nisim me ekspozitën e artistit kontemporan Robert Aliaj, e cila qysh në hyrje shtron pyetjen thelbësore: Muri më mbron por njëkohësisht edhe më izolon. Duhet unë të jem mirënjohës apo duhet t’i trembem?

Me këtë instalacion, nis komunikimi i veprës së plotë të Robertit, që përmban performancë, piktura e imazhe.

“Jo vetëm ne që kaluam atë periudhën e diktaturës, por edhe brezat e rinj vendosën mure të reja, u vendosën edhe mure nga të tjerë”, u shpreh artisti.

Kjo vepër së pari mbetet individuale sepse shpërfaq qasjen e komunikimit të brendshëm të artistit, e pas kësaj shndërrohet gjithëpërfshirëse sepse komunikimi është social, politik dhe aktual.

“Jemi shoqëri që atë vëllavrasjen, gjakmarrjen e kemi  politike, më shumë se personale. Ne jetojmë që të marrim hak për ata që na shtypin kokën”, tha ai më tej.

Artisti i angazhuar shkon përtej, dhe e quan të domosdoshme që arti të mos mbesë në kornizat e të qenit i bukur dhe estetik, por ai duhet të flasë dhe të ngrejë debat.

Një nga veprat autentike e ekspozitës mbetet performanca konceptuale “Qyteti i mbrapshtë”

“Kjo është një nga ato veprat që nuk e kemi lënë me një përgjigje, e kemi lënë të vetë-përcaktohet nga publikuar dhe të shijohet nga publiku”, tha kurtatori Klod Dedja.

“Hapësira që na rrethon” është një tjetër ekspozitë që mund ta shijoni në Kalanë e Tiranës.

Secili prej artistëve të rinj, “Hapësirën që na rrethon” e ka parë në këtë këndvështrim.

“Një qenie njerëzore, një burrë,  një qytetar, një njeri që në një moment ndalon dhe ndihet i observuar nga ky boshllëk urban dhe mban në shpatulla një wc”, tregoi artisti, Artan Shabani.

Ndonëse kjo fundjavë nuk rezervon shfaqje teatrale për publikun kryeqytetas, regjisori i njohur Kiço Londo, nis udhëtimin teatror në qytete e Shqipërisë me tetarin “Shëtitës Çajupi”.

Në kalendarin artistik veç shfaqjeve për publikun e madh, një vend të veçante mbajnë edhe ato për publikun e vogël.

Rrugët e qytetit të bukur të Korçës këtë të shtunë do të pushtohen nga festa traditë e qytetit juglindor, me “Karnavalet e Korçës”.

Po aq e bukur do të jetë fundjava edhe në qytetin bregdetar të Vlorës, ku do të mbahet “Aulona Inter Folk Festival”, që do të sjelli performaca me muzikë tradicionale.