Fushata dhe alternativat, fati i partive të reja përballë atyre tradicionale  

Zgjedhjet e 25 prillit po afrojnë. Qytetarët ndihen të lodhur nga politika e cila prej vitesh duket se nuk po prodhon asgjë të re.

Përfshirja e Edi Ramës në jetën publike dhe politike të vendit ka nisur me lëvizjen për demokraci që çoi në rrëzimin e regjimit komunist në Shqipëri, ku Rama ishte një nga udhëheqësit e lëvizjes studentore në Akademinë e Arteve të Bukura.

Edi Rama hyri në politikë në cilësinë e Ministrit të Kulturës, Rinisë dhe Sporteve, 23 vjet më parë, në vitin 1998.

Nga këto për 11 vjet drejtoi Bashkinë e Tiranës.

Prej 16 vjetësh Rama mban postin e kryetarit të partisë socialiste të Shqipërisë.

Pas 8 vjetësh në opozitë dhe 8 në qeveri, ai kërkon mandatin e tretë, edhe pse Partia Socialiste dhe ajo demokratike, çdo 8 vjet në këto 30 vite kanë kryer rotacionin e pushtetit.

Lulzim Basha iu bashkua Partisë Demokratike të Shqipërisë në janar të vitit 2004 si Koordinator i Komitetit të Orientimit të Politikave në këtë parti.

Në vitin 2005 ai u zgjodh për herë të parë deputet i qarkut Tiranë. Pas zgjedhjeve Basha u bë Ministër i Punëve Publike, Transportit dhe Telekomunikacionit, ku shërbeu për një periudhë 2- vjeçare, derisa u emërua Ministër i Punëve të Jashtme në vitin 2007.

Basha mbajti postin e Ministrit të Punëve të Jashtme nga maji 2007 deri në shtator 2009.

Pas zgjedhjeve të vitit 2009 në të cilat Lulzim Basha u zgjodh deputet i Elbasanit, ai u emërua Ministër i Brendshëm në qeverinë e re Berisha.

Në 2011 u zgjodh kryetar i bashkisë Tiranë, detyrë që do ta ushtronte vetëm për një mandat.

Prej vitit 2013, pas dorëheqjes së Kryetarit të Partisë Demokratike Sali Berisha, Lulzim Basha mban postin e kryetarit të Partisë Demokratike të Shqipërisë.

Pas 8 viteve pritje në opozitë Basha kërkon votëbesimin e shqiptarëve në zgjedhjet e 25 prillit, për të sjellë forcën që drejton në krye të shqiptarëve.

Monika Kryemadhi që prej vitit 1991 është një nga themeluesit e FRESSH. Ka qenë anëtare e Partisë Socialiste nga dhjetori 1991 deri në shtator të vitit 2004. Anëtare e Kuvendit të Shqipërisë nga viti 2001 deri 2005.

Në shtator të vitit 2004, Kryemadhi ishte një nga themeluesit e Partisë Socialiste për Integrim. Gjatë periudhës 2005-2013 ka mbajtur pozicionin e Sekretares Organizative në LSI.

Më 5 korrik 2017, Kryemadhi u zgjodh kryetarja e re e Lëvizjes Socialiste për Integrim forcë që vazhdon ta drejtoj edhe aktualisht.

Pas 8 vjetësh në koalicion me qeverinë Berisha, pas ftesës së Edi Ramës para zgjedhjeve të vitit 2013, LSI u bë pjesë e koalicionit të partisë socialiste më të cilin bashkë qeverisën 4 vjet.

Pas kalimit në opozitë, deputetët e LSI dogjën mandatet, dhe në prag të zgjedhjeve të 25 prillit kryetarja e LSI Kryemadhi u rreshtua në koalicionin parazgjedhor të të djathtëve.

Premtimet janë të vjetra, Edi Rama kërkon mandatin e tretë duke vazhduar të premtoi 24 orë ujë. Lulëzim Basha anëtarësimin e Shqipërisë në Bashkimin Evropian, ndërsa Monika Kryemadhi, se do të ndal largimin e të rinjve.

Po cilat kanë qenë alternativat e reja politike në 30 vite demokraci në Shqipëri dhe çfarë produkti kanë sjellë ato?

Lëvizja social – politike G99 ishte formacioni më i ri politik në zgjedhjet e 28 qershorit 2009 , pjesë e koalicionit të majtë opozitar. Shumica e anëtareve të saj ishin ish-aktivistë të Lëvizjes qytetare “MJAFT”. Kryetari Erion Veliaj e përdori lëvizjen mjaft e më pas G99 për katapultimin e tij personal në politikë.

Në 2013 do të ishte partia Aleanca kuq e zi  e Kreshnik Spahiu që do të garonte si një parti e pavarur, por që nuk arriti të kaloj pragun dhe të ketë përfaqësues në parlament.

Para zgjedhjeve të vitit 2017 u themelua partia sfida për Shqipërinë, e Gjergj Bojaxhiut, e cila pati të njëjtin fat.

Nisma Thurje” është partia e re e cila do të garojë në zgjedhjet e 25 prillit. Në krye të kësaj partie është Endrit Shabani.

Ndonëse shqiptarët në vite kanë treguar varësi ndaj partive tradicionale, fati i partive të reja të pavarura, pritet të vihet edhe njëherë në provë më 25 prill.