Gara SHBA-Kinë për dominimin ushtarak me AI po përshpejtohet

Kina po integron inteligjencën artificiale (AI) në të gjithë strukturën e saj ushtarake, me synimin për të transformuar mënyrën e komunikimit, luftës.

Pekini po avancon një strategji të quajtur “AI Plus”, e cila synon përdorimin e inteligjencës artificiale në sistemet e luftës elektronike (EW), me qëllim për të neutralizuar sistemet e bllokimit të armikut.

Raportohet gjithashtu se Kina po zhvillon sisteme që mund të ndihmojnë në parashikimin dhe koordinimin e sulmeve kibernetike dhe elektronike ndaj dronëve që ndodhen deri në 5,000 kilometra larg, pa përdorur domosdoshmërisht satelitë.

Në të njëjtën kohë, ushtria kineze po eksperimenton me përdorimin e AI për të simuluar sjelljen e valëve radio në ajër dhe në det, duke mundësuar krijimin e sistemeve të komunikimit të menjëhershëm midis dronëve, anijeve luftarake dhe madje edhe nëndetëseve.

Kina shihet gjithashtu si konkurrentja kryesore e Shteteve të Bashkuara në garën globale për zhvillimin e inteligjencës artificiale në sektorin ushtarak. Që në vitin 2017, vendi publikoi një plan strategjik për zhvillimin e gjeneratës së re të AI, me objektivin për të arritur nivelin botëror në teori, teknologji dhe aplikim deri në vitin 2030.

Në dokumentet ushtarake të mëvonshme, Pekini ka theksuar se lufta po kalon drejt “luftës inteligjente”, ku teknologjitë si AI, robotika dhe sistemet pa pilot po bëhen gjithnjë e më të rëndësishme në konkurrencën ushtarake globale. Edhe presidenti Xi Jinping ka bërë thirrje për zhvillimin e forcave “inteligjente dhe pa pilot”, duke e konsideruar inteligjencën artificiale si një element kyç për fuqinë globale në shekullin e 21-të.