Erdogan gati të ndërmjetësojë krizën Rusi-Ukrainë

Presidenti turk Recep Tayyip Erdogan përsëriti të martën, pas takimit me homologun ukrainas, se Turqia është gati të bëjë gjithçka për të zgjidhur krizën mes Rusisë dhe Ukrainës, duke u ofruar edhe për organizimin e një takimi mes liderëve të dy vendeve.

Në një deklaratë të bërë pas më shumë se 4 orë bisedime me Volodymyr Zelenskij në Kiev, Erdogan përsëriti gjithashtu vendosmërinë e Turqisë për të mbështetur integritetin territorial të Ukrainës.

“Sikurse e kam thënë, Turqia është gati të bëjë gjithçka për t’i dhënë fund krizës mes dy vendeve mike të saj, që janë dhe fqinje në detin e Zi. Gjatë bisedimeve të sotme ritheksova se mund të organizojmë edhe një samit në nivel liderësh ose në nivel teknik”, u shpreh presidenti turk.

Nga ana e tij, Zelenskij e mirëpriti ofertën e presidentit turk.

“Do të doja të falënderoja presidentin Erdogan për iniciativën e tij për t’u bërë një ndërmjetës mes Ukrainës dhe Rusisë për t’i dhënë fund luftës. Në Ukrainë jemi gati të bëjmë maksimumin për çdo platformë dhe çdo format”, tha presidenti i Ukrainës.

Ankaraja ka marrëdhënie të mira me Kievin dhe Moskën, por ka deklaruar se në rast pushtimi të Ukrainës do të veprojë sikurse vendet anëtare të NATO-s.

Nga ana e saj, Rusia siguroi të enjten mbështetjen e Kinës sa i takon çështjes së Ukrainës. Gjatë një vizite në Pekin, ministri i Jashtëm rus Sergei Lavrov mori garanci nga homologu kinez për mbajtjen e një qëndrimi të koordinuar.

LEXONI GJITHASHTU:

• Mbi 8 mijë trupa ushtarake amerikane në Europë për tensionet Rusi-Ukrainë
• Putin: SHBA po tenton ta tërheqë Rusinë në luftë