‘Gati të paguajmë çmimin’, Stoltenberg për mbështetjen e Ukrainës: Është një detyrim

NATO është gati të paguajë çmimin për mbështetjen e Ukrainës. Kështu deklaroi sekretari i përgjithshëm Jens Stoltenberg në Asamblenë e Përgjithshme të Aleancës të mbajtur në Madrid.

Në cilësinë e vendit pritës, kryeministri spanjoll i dërgoi një mesazh presidentit rus.

“Do të ishte mirë për të gjithë t’i dërgonim një mesazh Vladimir Putin, që ta lërë Ukrainën rehat, që të respektojë integritetin e saj territorial, sovranitetin dhe mundësinë për të zgjedhur të ardhmen”, tha Pedro Sanchez, kryeministër i Spanjës.

Presidenti ukrainas ka përsëritur dëshirën që populli i tij t’i bashkohet NATO-s dhe BE-së. Ne ndajmë të njëjtat vlera, theksoi ai.

Sekretari i përgjithshëm Jens Stoltenberg e vuri theksin tek nevoja për të vijuar mbështetjen e Ukrainës.

“Duhet ta kuptojmë se kjo luftë do të mbyllet në tryezën e negociatave. Por ne e dimë gjithashtu se rezultati i këtyre negociatave varet nga forca në fushën e betejës”, u shpreh kreu i NATO-s.

Stoltenberg shtoi se çmimi që Aleanca do të paguajë nëse Ukraina nuk ndal Rusinë do të jetë shumë më i lartë se paratë. Ukraina, tha ai, po paguan në gjak.

Stoltenberg u sugjeroi vendeve anëtare se shpenzimi prej 2 për qind të GDP-së për mbrojtjen duhet të konsiderohet si minimal.