“Gjak dhe zjarr”, I riu në trenin grek: U duk si tërmet, nxora aq njerëz sa munda

Një pasagjer në vagonin numër 6 të trenit të udhëtarëve në Greqi tregoi për mediat traumën e përjetuar pas përplasjes me një tren mallrash.

“Isha në vagonin 6 dhe u duk si tërmet. Kështu e ndjemë. Në vagonin tim ishte një grua e cila ishte çarë në vetull, por asgjë serioze. Pastaj, me disa persona të tjerë, u përpoqëm që të nxirrnim jashtë shumicën e pasagjerëve, më së shumti gra dhe të moshuar,” – tha ai.

I riu tha se e kishte pushtuar ankthi dhe as nuk mund të përshkruante atë që kishte përjetuar. Vagonët ishin përfshirë nga flakët dhe kishte gjak gjithandej, siç tregon ai.

“Çfarë mund t’ju them, gjak, më ka pushtuar ankthi, nuk mundem as të flas. Gjërat ishin tragjike. Vagoni 2 u përplas, aty ku ndodhet kafeneja, ku edhe duhet të ketë më shumë viktima, por nuk mund t’i afroheshe. Ishte në zjarr, plot me flakë. U mundova të futem nën disa mbetje, por nuk mund të merrje frymë, nuk mund të futeshe dot,” – tregoi ai.

LEXONI GJITHASHTU:

• Mjekët në Greqi: Identifikimi i viktimave do shumë kohë, trupat të karbonizuar
• Të paktën 36 viktima nga përplasja e trenave në Greqi, 85 të plagosur