Gjarpri pickon 10-vjeçaren, mjeku: Fëmija helmohet më shumë se kanë peshë të vogël

Toksikologu Alert Drishti është shprehur se intoksikimi nga kafshimi i gjarprit është më i fortë te peshat trupore më të vogla dhe anasjelltas.

Komentet Drishti i bëri në emisionin “Good Morning Albanians” në Euronews, ku tha se helmi vepron më fuqishëm te fëmijët, pasi janë peshë më e vogël.

Komentet ai i bëri pas ngjarjes së ditës së djeshme në Tiranë, ku një 10-vjeçare u kafshua nga gjarpri në ambientet e shkollës.

“Mund të themi që ashtu si edhe medikamentet, edhe helmet janë për kilogramë peshë trupore. Sa më peshë trupore të vogël të ketë njeriu, aq më i fortë është edhe intoksikimi. Kështu që intoksikimi te fëmijët që kanë pesha më të ulëta, është me shfaqje klinike më të rënda.

Po flasim në përgjithësi, pastaj varet nga zona, nga sasia e helmit që ka marrë trupi i njeriut pas kafshimit. Pra ka disa faktorë që flasin për rëndim ose lehtësim efektit të helmimit. Varet gjithmonë nga zona e kafshimit.

Në momentin që kafshon gjarpri dhe penetron në venë, helmi merret shumë shpejt. Nëse kafshon në inde të buta, pra në muskuj, koha e veprimit të helmit zgjatet. Mund të kemi edhe në indet dhjamore, që koha e veprimit është edhe më e gjatë”, tha Drishti.

LEXONI GJITHASHTU:

• Greqi, një grua kafshohet nga gjarpri teksa lahej në det
• Rrëfehet blogerja shqiptare: S’e hëngra dot gjarprin e pjekur në hell në Kamboxhia