Gjermania mund ta përballojë embargon e naftës ruse, thotë Ministri i Ekonomisë

Gjermania ka deklaruar se do të jetë në gjendje të përballojë mbajë nën kontroll furnizimin me naftë të vendit, nëse furnizimet ruse do të ndërpriteshin nga një embargo, ose nga ndonjë vendim i mundshëm i Moskës për të mbyllur rubinetet.

Ministri i Ekonomisë, Robert Habek e bëri këtë deklaratë përpara një takimi urgjent të ministrave të energjisë të Bashkimit Europian, të hënën në Bruksel.

BE po shkon drejt ndalimit të importeve të naftës ruse deri në fund të vitit, thanë diplomatët, pas bisedimeve midis Komisionit Europian dhe vendeve të BE-së në fundjavë.

Shumë vende të BE-së janë të varura nga Moska për nevojat e energjisë, dhe ka mosmarrëveshje mbi mënyrën se si duhet të zbatohen sanksionet.

Habek tha se nafta ruse përbën 12% të importeve totale në Gjermani, nga 35% që ishin para luftës.

Ai pranoi se ndërprerja e këtyre furnizimeve mund të sjellë rritje të çmimeve dhe mungesa, por në asnjë rrethanë Gjermania nuk do të përfundonte “në një krizë nafte”.

LEXONI GJITHASHTU:

• Sholc i bën thirrje Putinit që t’i japë fund luftës në Ukrainë