Gjermania, Polonia dhe Norvegjia do dërgojnë paketë 500 milionë dollarë për Ukrainën

Gjermania, Polonia dhe Norvegjia do të ofrojnë së bashku një paketë të re mbështetjeje për Ukrainën, me vlerë totale 500 milionë dollarë, prej të cilave 200 milionë do të mbulohen nga Berlini.

Njoftimi u bë nga Ministri i Jashtëm gjerman, Johannes Wanterful, para fillimit të samitit të Këshillit të Ministrave të Jashtëm të NATO-s në Bruksel.

“Qeveria federale është shumë krenare që, së bashku me miqtë tanë në Poloni dhe Norvegji, mund të krijojmë një paketë të madhe tjetër, e cila është e domosdoshme për mbështetjen e Ukrainës. 500 milionë dollarë është një shumë e konsiderueshme, prej të cilave 200 milionë sigurohen nga Gjermania,” tha Wanterful.

Sipas ministrit gjerman, kjo paketë e re mbështetëse për Ukrainën tregon gjithashtu se “jemi të vendosur së bashku të kundërshtojmë aktivisht agresionin rus.”

Ministri i Jashtëm gjerman përshëndeti të gjitha përpjekjet që synojnë përfundimin e luftës së Rusisë kundër Ukrainës, por theksoi mungesën e gatishmërisë nga pala ruse për negociata serioze paqësore.

“Aktualisht nuk shohim asnjë vullnet serioz nga Rusia për të nisur një proces negociatash. Prandaj duhet të jetë e qartë ku qëndrojmë. Jemi fuqishëm në krah të Ukrainës. Jemi të gatshëm dhe të aftë të mbështesim Ukrainën sa të nevojitet. Kjo vërtetohet nga kjo paketë dhe përpjekjet tona të mëtejshme edhe në nivel evropian, për të përdorur asetet ruse të ngrira,” përfundoi kreu i Shërbimit të Jashtëm Gjerman.

LEXONI GJITHASHTU:

• Putin kërcënoi se është gati për luftë me Evropën, reagon kreu i NATO-s
• Estonia gati të dërgojë trupa në Ukrainë për garanci sigurie