Gjunjëzimi i ekonomisë, Kosova humb 50 mijë vende pune nga pandemia, preken të gjithë sektorët

Përveç në shëndetin publik, pa dyshim pandemia ka ndikuar dukshëm edhe në rënien ekonomike në Kosovë, në rënien e cilësisë në arsim, mbylljen e mbi 10 mijë bizneseve dhe humbjen e mbi 50 mijë vendeve të punës.

Këto janë disa nga shifrat që u prezantuan gjatë forumit të organizuar nga Instituti për Hulumtime Sociale “Paragon” me temën “Ndikimi i pandemisë COVID-19 në tregun e punës, sfidat si dhe pritshmëritë”.

Florian Aliu nga ky Institut gjatë prezantimit të hulumtimit theksoi se pandemia ka ndikuar që për rreth 150 mijë punëtor në sektorin privat ende të ketë vështirësi për sigurimin e pagave.

Një ndër sektorët më të dëmtuar direkt nga masat kufizuese është sektori i gastronomisë.

Ndërkaq efektet e pandemisë, kanë sjellë një varg pasojash që kanë pasur impakt direkt edhe në arsim apo në fushën e mediave.

Puna kërkimore e bërë dhe rezultatet e dala nga këto hulumtime, kanë nxjerrë si domosdoshmëri ndërtimin e një sistemi të fortë shëndetësor, forcimin e skemës për mbrojte sociale dhe ekonomike, rritjen e sistemit të mbrojtjes për punëtorët dhe të drejtat e tyre, si dhe mobilizimin e burimeve financiare për transformimin ekologjik të ekonomisë.