Gjykata Evropiane ndëshkon Poloninë dhe Hungarinë

Gjykata Evropiane e Drejtësisë i hapi rrugë të mërkurën BE-së që të shkurtojë miliarda euro fonde për Poloninë dhe Hungarinë, ku udhëheqësit populistë akuzohen se po shkelin të drejtat dhe liritë demokratike.

Vendimi i Gjykatës Evropiane të Drejtësisë, që hodhi poshtë paditë e Varshavës dhe Budapestit kundër sanksioneve të BE-së, nuk mund të apelohet.

Në lojë, pas këtij vendimi, janë miliarda euro fonde, kohezioni i brendshëm i BE-së dhe qëndrimi i Unionit për çështjet ndërkombëtare.

Komisioni Evropian, përmes zëdhënëses Dana Spinant, ka deklaruar se mirëpret vendimin e gjykatës. Ndërsa për kryeministrin polak, vendimi tregon rrezikshmërinë që rrjedh nga pushteti i institucioneve evropiane.

“Centralizimi i strukturave të BE-së është një proces i rrezikshëm. Në dialogun tonë me BE-në, që nuk është një dialog i barabartë, ne këtë po përpiqemi të vëmë në dukje. Kështu e interpretoj unë vendimin”, tha Mateusz Morawiecki, kryeministër i Polonisë.

Ndërsa ministria hungareze e Drejtësisë tha se vendimi është politik dhe i nxitur nga ligji hungarez për mbrojtjen e fëmijëve, duke iu referuar legjislacionit të partisë në pushtet që kufizon mësimet për homoseksualizmin dhe çështjet transgjinore në shkolla.

“Gjykata Evropiane e Drejtësisë mori një vendim politik për shkak të referendumit tonë të ardhshëm mbi mbrojtjen e fëmijëve. Por kjo nuk ishte një surprizë për ne, pasi më herët kryetari i gjykatës e kishte lënë të kuptohej se çfarë duhet të prisnim”, tha Judit Varga, ministre e Drejtësisë, Hungari.

36 miliardë euro nga fonde për rikuperimin nga pandemia të planifikuara për Poloninë dhe 7 miliardë euro për Hungarinë janë ngrirë tashmë nga Komisioni Evropian.

Dy vendet, që u bënë anëtare të bllokut në vitin 2004, kanë kërcënuar me bllokimin e vendimeve të BE-së, të cilat kërkojnë unanimitet e që përfshijnë ato për politikën e jashtme, klimën dhe energjinë.

LEXONI GJITHASHTU:

• Polonia ndërton gardh në kufirin me Bjellorusinë
• Hungaria refuzon NATO-n: Ukraina të zgjidhet me dialog