Gjykata Kushtetuese e Koresë së Jugut nis procedurat për shkarkimin e Yoon Suk Yeol

Gjykata Kushtetuese e Koresë së Jugut ka filluar shqyrtimin e shkarkimit të presidentit Yoon Suk Yeol, i cili u pezullua pas shpalljes së ligjit ushtarak dhe nxitjes së trazirave politike. Parlamenti votoi për shkarkimin e tij pas protestave masive që kërkonin largimin e tij nga posti.

Teksa protestat vazhdojnë , gjykata ka gjashtë muaj për të marrë një vendim. Procesi gjyqësor po zhvillohet në një kohë kur gjykata ka vetëm gjashtë nga nëntë gjyqtarët e nevojshëm, por ajo ka deklaruar se mund të vazhdojë procesin me këtë përbërje.

Nëse shkarkimi miratohet, vendi do të mbajë zgjedhje të reja presidenciale brenda 60 ditëve, ndërsa aktualisht kryeministri Han Duck-soo po shërben si president në detyrë.

Yoon ka refuzuar të bashkëpunojë me prokurorët dhe mund të përballet me arrestim nëse vazhdon të mos paraqitet për marrje në pyetje. Ai ka deklaruar se do të luftojë për të mbrojtur vendimin e tij deri në fund.

Ndërkohë, Partia e Fuqisë Popullore (PPP) ka përjetuar kriza të brendshme, me liderin e saj që ka dhënë dorëheqjen pas ngjarjeve të fundit.

LEXONI GJITHASHTU:

• Presidenti i Koresë së Jugut: Nuk do të shmang përgjegjësitë ligjore dhe politike
• Presidentit të Koresë së Jugut i ndalohet dalja jashtë shtetit