Gjykata Penale liron nga akuzat organizatorët e dhunës në Kuvendin maqedonas

Më 23 janar 2025, Gjykata Themelore Penale e Shkupit vendosi të lirojë nga ndjekja penale ish-kryetarin e Kuvendit, Trajko Veljanovski, ish-ministrat Spiro Ristovski dhe Mile Janakievski, si dhe ish-drejtorin e Drejtorisë për Siguri dhe Kundërzbulim, Vladimir Atanasovski.

Këta individë ishin akuzuar për “rrezikim terrorist të rendit kushtetues dhe sigurisë” lidhur me ngjarjet e dhunshme në Kuvendin e Maqedonisë së Veriut më 27 prill 2017.

Vendimi i gjykatës u bazua në mendimin e Prokurorisë Themelore për ndjekjen e krimit të organizuar dhe korrupsionit, e cila sugjeroi zbatimin e Ligjit për amnisti të vitit 2018. Gjykatësi Ilija Trpkov deklaroi se, megjithëse ai personalisht dhe Këshilli gjyqësor besojnë se qëllimi i ligjvënësve nuk ishte amnistimi i organizatorëve, dispozitat e Ligjit për amnisti lejojnë një interpretim të tillë.

Më 26 korrik 2021, Gjykata Penale e Shkupit kishte dënuar me gjithsej 25 vjet burgim të njëjtët persona për të njëjtën vepër penale. Trajko Veljanovski ishte dënuar me 6 vjet e 6 muaj burg, ndërsa Spiro Ristovski dhe Mile Janakievski me nga 6 vjet e 3 muaj burg secili, dhe Vladimir Atanasovski me 6 vjet burg.

Ngjarjet e 27 prillit 2017, të njohura si “e enjtja e përgjakshme”, përfshinin hyrjen me dhunë të protestuesve në Kuvendin e Maqedonisë së Veriut, duke sulmuar deputetë dhe gazetarë, në përpjekje për të penguar zgjedhjen e kryetarit të ri të Kuvendit.

LEXONI GJITHASHTU:

• Aksion në Maqedoninë e Veriut për makina të kontrabanduara nga vendet e BE-së
• Maqedonia e Veriut ul sërish çmimin e naftës, Shqipëria me e shtrenjta në rajon