Grabiten bizhuteri me vlerë 15 milionë euro në një argjendari në Paris

Tre persona të armatosur kanë hyrë në një argjendari dhe kanë grabitur bizhuteri në shuma marramendëse.

Sipas mediave franceze, vlera e tyre kap shumën e 15 milionë euro. Ngjarja ka ndodhur në një nga lagjet më të njohura në Paris, në argjendarinë “Plagët”.

Mësohet se grabitësit e armatosur, hynë në dyqan si klientë dhe më pas kërcënuan stafin me armë.

Në momentin e grabitjes ka pasur edhe klientë që ndodheshin brenda. Të gjithë punonjësit u dërguan në pjesën e pasme të dyqanit, dhe personat që ndodheshin në argjendari u shtrinë në tokë.

Më pas grabitësit detyruan një anëtar të stafit të hapte kasafortën ku ruheshin aksesorët më të shtrenjtë.

Në këtë rast, raportohet se ishin të përfshirë dy burra dhe një grua.

LEXONI GJITHASHTU:

• Meta do t’u kërkojë përdoruesve në BE leje për përdorimin e të dhënave
• Lëkundje tërmeti në Turqi, sa ishte magnituda