Grabitet qytetari në Bulqizë, i prezantohen si policë dhe i marrin me dhunë paratë

Dy shtetas të moshës 36 dhe 26-vjeç janë arrestuar nga policia e Bulqizës pasi i morën me forcë një shumë parash një bashkëqytetari të tyre. Bëhet me dije se agresorët iu prezantuan shtatsit në fjalë si punonjës policie dhe i morën me dhunë shumën e parave.

Njëri nga të arrestuarit rezulton i dënuar më parë për krime kundër personit dhe pronës.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme, për veprat “Vjedhja me dhunë” dhe “Përvetësimi i titullit apo i detyrës shtetërore”.

“Menjëherë pas kallëzimit të një 36-vjeçari, se rreth orës 22:00 të datës 21.05.2024, 2 shtetas që i ishin prezantuar si punonjës policie, i kishin marrë me forcë, në rrugë, një shumë të vogël parash, Komisariati i Policisë Bulqizë ka organizuar punën për identifikimin dhe kapjen e autorëve.

Si rezultat i veprimeve të shpejta hetimore dhe policore, të kryera në kuadër të operacionit “Prezantimi”, u vunë në pranga shtetasit D. T., 26 vjeç (i dënuar disa herë, për vepra penale kundër personit dhe pronës) dhe V. B., 36 vjeç, të dy banues në Bulqizë”, njofton policia.