Grevat paralizojnë Britaninë | Punonjës të sektorëve të ndryshëm bojkotojnë punën

Britania e Madhe është përballur të mërkurën me një nga protestat më të mëdha të 10 viteve të fundit, të organizuara nga punonjës të sektorëve të ndryshëm.

Të parët që kanë braktisur punën kanë qenë mësuesit, të ndjekur nga disa qindra mijëra punonjës të sektorit të transporteve.

Rreth 85 për qind e 23 mijë shkollave shtetërore në Angli dhe Uells kanë qëndruar të mbyllura tërësisht ose pjesërisht për shkak të protestave të docentëve, që sikurse punonjësit e sektorëve të tjerë kërkojnë rritje të pagave përballë shtrenjtimit të jetesës.

Protestat e arsimtarëve janë mbajtur si përpara Ministrisë së Arsimit në Londër, ashtu edhe në selitë e universiteteve, pasi atyre u janë bashkuar edhe punonjësit e administratës.

Sa i takon transporteve kanë qenë makinistët ata që kanë bojkotuar punën, bashkë me drejtuesit e autobusëve, duke lënë të boshatisura stacionet kryesore të kryeqytetit britanik.

Në mbarë Mbretërinë e Bashkuar vazhdon përplasja mes qeverisë konservatore dhe sindikatave. Ministrja e Arsimit, Gillian Kigan ka kritikuar protestën e mësuesve, e cila sipas saj nuk ishte e nevojshme për sa kohë negociatat janë në zhvillim e sipër dhe ekzekutivi është shprehur i gatshëm për një rritje të pagave.

LEXONI GJITHASHTU

• Franca përfshihet nga grevat, protesta ndaj rritjes së moshës së pensionit
• Britania ligj kundër grevave: Standardi minimal i shërbimit të jetë i garantuar
• Greva dhe protesta në Evropë, qytetarët kërkojnë rritje pagash