Hamas i përgjigjet SHBA, kërkon ndryshime në planin amerikan për armëpushim

Lëvizja islamike e Hamasit iu përgjigj propozimit të SHBA për armëpushim duke u shprehur e gatshme të lirojë 10 pengje izraelite ende në jetë dhe të dorëzojë 18 të tjerë të vdekur, në këmbim të një numri të pacaktuar të burgosurish palestinezë.

Por grupimi militant ka kërkuar gjithashtu disa ndryshime në plan, duke përsëritur kërkesat e tij për tërheqje të plotë të trupave izraelite nga Gaza dhe garanci për hyrjen e ndihmave humanitare, pika të cilat nuk janë në tryezë.

Përgjigjja nuk ishte as një refuzimi i pastër dhe as një pranim i kushteve amerikane, të cilat sipas Uashingtonit, janë pranuar nga pala izraelite.

Hamas ka deklaruar se ia ka dorëzuar përgjigjen të dërguarit të Shteteve të Bashkuara, Steve Witkoff, me kërkesë direkte të presidentit Donald Trump.

Ndërkohë, të paktën 26 persona janë vrarë në Gaza pasi tanket izraelite hapën zjarr ndaj një qendre ndihmash, duke lënë edhe 150 palestinezë të tjerë të plagosur.

Nga ana e tyre, Forcat Mbrojtëse Izraelite kanë deklaruar se nuk janë në dijeni të dëmeve në njerëz të shkaktuara nga zjarri i tyre, por po e hetojnë ngjarjen.

Izraeli vendosi një bllokadë totale ndaj Gazës dhe rifilloi ofensivën e tij ushtarake ndaj Hamasit më 18 mars, duke shfuqizuar një armëpushim 2-mujor të ndërmjetësuar nga Shtetet e Bashkuara, Katari dhe Egjipti.