Hamasi pranon marrëveshjen për armëpushim, Izraeli ende pa një qëndrim zyrtar

Hamasi ka pranuar një marrëveshje armëpushimi që përfshin lirimin e një pjese të pengjeve izraelite në këmbim të të burgosurve palestinezë në burgjet izraelite. Lajmi është konfirmuar një deklaratë zyrtare e lëvizjes palestineze.

Sipas Hamasit, marrëveshja është propozuar nga ndërmjetësuesit e Katarit dhe Egjiptit, të cilët kanë zhvilluar bisedime intensive gjatë javëve të fundit. Propozimi mbështetet në planin e dorëzuar në qershor nga i dërguari amerikan, Steve Witkoff, dhe parashikon një armëpushim të menjëhershëm.

Në kuadër të marrëveshjes, forcat izraelite do të zhvendosen në pozicione të përcaktuara sipas planit amerikan, ndërkohë që ndihmat humanitare do të lejohen të hyjnë në Gaza në mënyrë të zgjeruar, për të përballuar nevojat urgjente të popullatës civile.

Një zyrtar i lartë i Hamasit, në një prononcim për CNN, deklaroi se marrëveshja përfshin lirimin e 10 pengjeve izraelite të gjalla dhe kthimin e 18 trupave të pajetë. Në këmbim, Izraeli do të lirojë 140 të burgosur palestinezë me dënim të përjetshëm, 60 të dënuar me mbi 15 vjet, si dhe të gjithë të miturit dhe gratë e burgosura palestineze.

Megjithatë, deri më tani, nuk ka një reagim të qartë nga autoritetet izraelite. Javën e kaluar, zyra e kryeministrit Benjamin Netanyahu kishte theksuar se çdo marrëveshje duhet të përfshijë lirimin e të gjithë pengjeve njëherësh.

Në një video të publikuar pas raportimeve për pranimin e marrëveshjes nga Hamasi, Netanyahu nuk e komentoi drejtpërdrejt planin, por tha se “nga këto raportime mund të krijohet përshtypja se Hamasi është nën një presion të madh.”

Ndërkohë, Shefi i Shtabit të Ushtrisë izraelite, gjeneral-lejtnant Eyal Zamir, u shpreh se konflikti ka hyrë në një pikë kthese pas 22 muajsh luftë, duke theksuar se fokusi mbetet tek intensifikimi i operacioneve ushtarake kundër Hamasit në Gaza.

LEXONI GJITHASHTU:

• Trump po punon për armëpushim në Gaza: Së shpejti lirohen 10 pengje të tjera
• Izraeli jep dritën jeshile për marrëveshjen e pengjeve, pritet përgjigjja e Hamasit