Kandidatja demokrate për presidente Kamala Harris ka zhbërë avantazhin e rivalit republikan Donald Trump në pjesën dërrmuese të klasit të mesëm të shoqërisë amerikane, duke tërhequr banorët e periferive dhe ata me të ardhura të mesme.
Kështu tregon një sondazh analitik i dyshes “Reuters/IPSOS”.
Që kur presidenti Joe Biden e braktisi garën për rizgjedhjen më 21 korrik, zëvendës presidentja Harris ka marrë drejtimin e të dyja grupeve demografike, duke ringjallur perspektivën e demokratëve në zgjedhjet e 5 nëntorit, edhe pse diferenca në garë mbetet e ngushtë.
Zonat periferike, që përbëjnë rreth gjysmën e elektoratit amerikan dhe janë multietnike, kanë një rëndësi kyçe. Biden e mundi Trump në kontetë periferike me rreth 6 pikë përqindjeje në zgjedhjet presidenciale të 2020-s.
Përpara tërheqjes së tij, Trump kryesonte ndaj Biden 43 për qind me 40 në sondazhet e “Reuters dhe IPSOS” në qershor dhe korrik, rezultatet e të cilëve vinin në dukje nevojën për të rikthyer energjitë tek mbështetësit.
Harris nisi ta mbyllte hendekun kur nisi fushatën në korrik dhe i çoi shifrat 47 me 41 për qind në favorin e saj në radhët e votuesve periferikë në sondazhet e bëra në shtator dhe tetor.
Kjo sjell një lëkundje prej 9 pikësh në favor të demokratëve, sipas analizës së agjencisë prestigjioze të lajmeve dhe asaj të kërkimeve globale, që intervistuan 6 mijë votues të regjistruar.
Gjatë të njëjtave periudha, Trump kaloi nga udhëheqja kundrejt Biden 44 me 37 për qind tek qytetarët e klasit të mesëm, tek rënia 43 me 45 për qind përballë Harris.
Shifrat në fjalë kanë një marzh të ulët gabimi prej 3 pikë përqindjeje. Por vlen të theksohet se krahas zonave periferike një rëndësi të madhe për procesin elektoral kanë edhe zonat rurale, ku “ligjin” e bëjnë republikanët.
LEXONI GJITHASHTU:
- Gara Harris – Trump, muaji i fundit i fushatës për Shtëpinë e Bardhë
- Trump sulmon ashpër Kamala Harrisin: Është e “sëmurë mendore”
