Helmimi i 600 personave në Krujë, ISHP: Epidemi hidrike, ujësjellësi nuk veproi në kohë

Instituti i Shëndetit Publik ka publikuar analizat e mostrave të ujit të marrë nga ujësjellësi i Krujës, pas helmimit të rreth 600 qytetarëve.

ISHP bëri me dije se shkaktari i ndotjes së ujit në qytetin e Krujës ka qenë prania e bakterit enterokok.

Nëndrejtori i Institutit të Shëndetit Publik, Dritan Ulqinaku tha se nga analizat e marra nga ISHP ka rezultuar që në një pikë vetme të ujësjellësit të Krujës ka rezultuar bakteri enterokok i cili mendohet që mund të jetë shkaktari i këtyre shqetësimeve gastrointersinale që qytetarët e Krujës kanë pasur.

Ulqinaku tha se mendohet që kjo epidemi hidrike është shkaktuar si rezultat i ndotjes sipërfaqësore të shirave të rëna para pak ditësh që kanë sjellë përzierje me ujërat e pijshëm të ujësjellësit të Krujës.

“Është një epidemi hidrike dhe besoj se përgjegjësia bie mbi ujësjellësin e Krujës, duhet të kishte reaguar në kohë që me turbullirën e parë që është shkaktuar”, tha Ulqinaku.

Rreth 500 personat dyshohet se u helmuan nga uji i pijshëm në Krujë 2 ditë më parë, mes të cilëve edhe fëmijë.

Pjesa më e madhe e qytetarëve morën mjekim dhe u larguan nga spitali, ndërsa kishte edhe nga ata që shfaqën më shumë komplikime dhe vijuan mjekimin në spital.

Lidhur me këtë ngjarje reagoi edhe presidenti i vendit Ilir Meta, i cili kërkoi hetim dhe përgjegjësi nga institucionet përgjegjëse.

LEXONI GJITHASHTU:

• Prokuroria Krujë nis hetimet për helmimin e 500 banorëve