Hetimet për Ilaria Sulën, gjurmë e re ADN-je në valixhen ku u gjet e vdekur

Hetimet për vrasjen e studentes shqiptare Ilaria Sula nga ish-i dashuri i saj Mark Antony Samson, kanë marrë një drejtim të ri pas një zbulimi të rëndësishëm nga hetuesit italianë.

Sipas mediave lokale, në valixhen ku u fsheh trupi i vajzës dhe që më pas u hodh në një zonë pyjore jashtë Romës, janë zbuluar gjurmë ADN-je të një personi tjetër, të një mashkulli. Kjo ka shtyrë Prokurorinë e Romës të përqendrojë vëmendjen te babai i autorit të dyshuar të krimit.

Aktualisht ai nuk është zyrtarisht nën hetim, por ky zhvillim i ri e vendos atë në qendër të vëmendjes së hetuesve. Sipas dëshmisë së mamasë së Samson, ajo e ndihmoi të birin të fshihte gjurmët e gjakut pas vrasjes, por theksoi se bashkëshorti nuk ndodhej në banesë në momentin e ngjarjes.

Megjithatë, pritet që babai i autorit të merret sërish në pyetje dhe t’i nënshtrohet analizave për të përcaktuar nëse gjurmët e ADN-së në valixhe përputhen me të tijat.

Vrasja ndodhi në banesën e Mark Samson në Via Homs, Romë, ku viktima, 22-vjeçarja shqiptare Ilaria Sula, u godit me thikë në fyt për vdekje. Trupi i saj u zhduk për disa ditë, derisa u gjet i braktisur brenda një valixheje në një zonë shkëmbore rreth 40 kilometra larg kryeqytetit italian.

Pikërisht ADN-ja e gjetur nga prokuroria mund të hedh dritë mbi identitetin e personit që mund ta ketë ndihmuar Samson të zhdukë trupin.

LEXONI GJITHASHTU:

• “E ndihmova djalin”- Nëna e filipinezit pranon përfshirjen në vrasjen e Ilaria Sulës
• Nëna nuk mbahet dot: O Ilaria o shpirti im, shqiptarja përcillet në banesën e fundit