Ambasadori amerikan në Beograd, Christopher Hill tha se qeveria e Serbisë ka të drejtë t’i drejtohet KFOR-it për kërkesën për kthimin e një pjesë të trupave serbe në Kosovë, por theksoi se është e nevojshme një zgjidhje politike.
Sipas tij, ajo që duhet bërë, është qetësimi i situatës, dhe krijimi i paqes e stabilitetit në veri të Kosovës, shkruan N1.
Ai përmendi gjithashtu edhe formimin e Asosacionit, për të cilën nënvizoi se duhet të ndodhë.
“Kjo është një çështje që mbetet politike dhe prandaj kërkon një zgjidhje politike”. “Unë nuk shoh mundësinë e një zgjidhjeje ushtarake. Njerëzit që jetojnë atje mund të kenë pritshmëri të qarta se si do të jetë jeta e tyre në të ardhmen, dhe kjo mund të arrihet përmes themelimit të Bashkësisë së Komunave Serbe,” tha Hill.
Presidenti i Serbisë, Aleksandër Vuçiç deklaroi pas seancës së 15 dhjetorit, do t’i kërkojë KFOR-it kthimin e 1 mijë trupave serbe në Kosovë.
Me këtë paralajmërim, ai iu përgjigj pranisë së shtuar të Policisë së Kosovës në pjesën veriore të vendit, e cila është e banuar me shumicë serbe.
Rezoluta 1244, e miratuar në vitin 1999, ofroi një kornizë për zgjidhjen e konfliktit në Kosovë, duke autorizuar vendosjen e një pranie ndërkombëtare, civile dhe ushtarake.
Ajo themeloi një administratë ndërkombëtare tranzitore dhe mbikëqyri tërheqjen e forcave ushtarake serbe nga Kosova.
Neni 4 vërteton se pas tërheqjes, një numri të personelit ushtarak dhe policor, jugosllav dhe serb, do t’i lejohet kthimi në Kosovë, për t’i ushtruar funksionet në përputhje me aneksin 2.
Neni 6 i aneksit 2 përmend funksionet e mëposhtme:
Ndërlidhja me misionin civil ndërkombëtar dhe me praninë ndërkombëtare të sigurisë; shënjimi/pastrimi i fushave të minuara; mbajtja e një pranie pranë objekteve të trashëgimisë serbe; mbajtja e një pranie në vendkalimet kryesore kufitare.
LEXONI GJITHASHTU
- ‘U shkel Marrëveshja e Uashingtonit’, Vuçiç flet për aplikimin e Kosovës për në BE
- Vjosa Osmani: Koha kur ushtria serbe na cënonte ka marrë fund
- Ministri serb: Të këmbëngulim për kthimin e trupave tanë në Kosovë
