Historike për Shqipërinë, finalja e parë e “Conference League” do të luhet në Tiranë

Finalja e parë e garës më të re për klube të krijuar nga UEFA, “Conference League” do të luhet në Shqipëri.

Lajmi është bëri i ditur nga Federata Shqiptare e Futbollit, që ka lajmëruar se do të jetë “Air Albania” impianti që do të presë ndeshjen e fundit të edicionit të parë të këtij kompeticioni.

Kjo është hera e parë që Shqipëria pret një ndeshje të një rëndësie të tillë.

“Conference League” është një kompeticion i ri që për herë të parë do të nisë rrugëtimin e saj në verën e vitit 2021.

Shqipëria do të përfaqësohet me tre skuadra, vendin e dytë dhe të tretë të kampionatit si dhe fituesen e Kupës së Shqipërisë.

Me krijimin e këtij kompeticioni, skuadrat shqiptare do të ndeshen me skuadra të një niveli të përafërt, çka do të mundësonte kalimin e më shumë tureve dhe rritjen e të ardhurave.

Sipas skemës së re, asnjë ekip nuk do të shkojë direkt në kualifikueset e Europa League, ndërsa nuk ndryshon situata me skuadrën kampione që do ta nisë rrugëtimin në arenën ndërkombëtare nga turi i parë kualifikues i Champions League.