Historike, Shkëndija dhe Drita kalojnë në fazën play-off të Conference League

Një kualifikim historik kanë arritur dy skuadrat shqiptare që garojnë në Conference League, Drita dhe Shkëndija, të cilat kanë siguruar kalimin në play-off të këtij kompeticioni.

Të dyja pësuan humbje në përballjen finale në fazën e ligës, por kjo ka pak rëndësi, pasi kishin pikët e nevojshme për të avancuar më tej.

Shkëndija luajti duelin e së enjtes në transfertë ndaj AEK Larnaca, të humbur me shifrat 1-0, por arriti të realizojë objektivin madhor.

“Mendoj që luanim ndaj një skuadre shumë cilësore, që ka mundur skuadra të nivelit shumë të lartë në këtë kompeticion. Normalisht janë emocione pozitive, pasi njëherë ëndërronim të futeshim në Conference League, pastaj ëndërronim të kalonim, dhe tani që kaluam, do të ëndërrojmë që të kalojmë edhe një raund tjetër. Ashtu jemi ne, veçanërisht tetovarët,” tha Jeton Beqiri, trajner i Shkëndijës.

Në ndeshjen tjetër, Drita pësoi disfatë 3-0 nga Rayo Vallecano, por gjithashtu arriti të sigurojë kalimin më tej, duke hedhur një hap historik në futbollin e Kosovës.