Hyrja e ndihmave në Gaza, OKB, thirrje palëve: Armëpushim humanitar imediat

20 kamionë të tjerë që transportonin ndihma humanitare hynë në Gaza të hënën, duke u bërë autokolona e tretë që nga nisja e luftës. Ngarkesat përmbanin medikamente, ujë dhe ushqime, sipas Gjysmëhënës së Kuqe palestineze.

Por karburanti mungonte dhe rezervat pritet të mbarojnë brenda dy ditëve të ardhshme. Kombet e Bashkuara kanë bërë thirrje për një “armëpushim humanitar imediat”, në mënyrë që të dërgohen më shumë ndihma.

Ndërkohë, Britania do të dërgojë 24 milionë dollarë ndihma shtesë për të ndihmuar civilët në Gaza. Kryeministri Sunak e bëri njoftimin pas udhëtimit në Lindjen e Mesme.

Përpjekjet diplomatike ndërkombëtare për krijimin e korridoreve humanitare vazhdojnë.

Më herët ishte radha e kryeministrit holandez Mark Rutte, që u takua si me homologun izraelit Benjamin Netanyahu, ashtu dhe me presidentin palestinez Mahmoud Abbas.

Rutte përsëriti se Izraeli ka të drejtë të vetëmbrohet, por i kërkoi Netanyahut që të minimizojë numrin e viktimave civile në Rripin e Gazës.

Një sesion i posaçëm do të zhvillohet të enjten në Asamblenë e Përgjithshme të OKB-së për të diskutuar luftën Izrael-Hamas.