Hysaj u përgjigjet kritikëve, analizon Italinë: Nuk është ashtu siç duket

Shqipëria ka zhvilluar stërvitjet e para në Kaiserau, aty ku do të qëndrojë përgjatë gjithë kampionatit evropian, ndërsa grupi është i plot me një atmosferë tejet pozitive.

Këtë të hënë u mbajt dhe konferenca e radhës për shtyp, ku i pranishëm ishte mbrojtësi Elseid Hysaj. Ky i fundit ka analizuar vështirësitë e kuqezinjve, si dhe u ka dhënë përgjigje kritikëve.

“Janë tre ndeshje shumë të forta, por edhe shumë të bukura. Duhet ta gëzojmë këtë Europian, nuk i dihet se çfarë mund të ndodhë. Dikush mund të mos thirret pas Europianit, por ndodh në futboll. Të kemi besim te vetja, mund të jemi një nga surprizat e Europianit”, tha Hysaj.

Italia është një kundërshtar që nuk duhet nënvlerësuar, pavarësisht formës.

“I kam parë dy ndeshjet miqësore që ka luajtur Italia. Duket nga jashtë sikur është një skuadër në vështirësi dhe po i mungon goli. Por nuk është ashtu siç duket. E njoh Italinë, e kemi parë edhe në Kampionatet e kaluara Europiane, të gjithë thonin që nuk arrin askund, por në fund fitoi Europianin”, u shpreh Hysaj.

Krahu i djathtë i mbrojtjes është cilësuar pika e dobët e kombëtares shqiptare.

“Sa i përket analizave të mediave, që thonë që mbrojtja në krahun e djathtë është e dobët, unë po bëj gati 12 vite që luaj në Serinë A dhe e di potencialin tim dhe se ku gaboj. I di gjërat ku gaboj dhe ku bëj mirë. Po në këtë Europian do të jem i përqendruar si të gjithë të tjerët, sepse e di këto ndeshje janë shumë të forta”, tha mbrojtësi i Kombëtares.

Kampionati evropian nis më 14 qershor, ndërsa një ditë më pas, në fushë zbresin kuqezinjtë.