I infektuar me Ebola, pacienti amerikan mbërrin në Gjermani për trajtim mjekësor

Një amerikan i cili u infektua me Ebola në Republikën Demokratike të Kongos ka mbërritur në Gjermani për trajtim. Lajmin e njoftoi të hënën ministria e shëndetësisë në Berlin, disa javë pasi një tjetër amerikan i infektuar me Ebola u trajtua në Berlin.

Ndërkohë, administrata Trump tha të hënën se po u bllokonte qytetarëve amerikanë në Kongo që të udhëtonin drejt SHBA-së me fluturime komerciale. Pacienti amerikan zbarkoi në Frankfurt gjatë natës dhe u transferua në spitalin universitar të qytetit.

Kreu i Organizatës Botërore të Shëndetësisë, OBSH tha se burri ishte një “punonjës humanitar” që kishte qenë në Bunia, kryeqytetin e provincës verilindore Ituri të RDK-së.

Një zyrtar që punonte për grupin e ndihmës së krishterë Samaritan’s Purse konfirmoi për Reuters se pacienti, rreth të 60-ave, ishte punonjës me kohë të plotë i organizatës që punonte si menaxher magazine në RDK.

Shpërthimi i vazhdueshëm në RDK është shkaktuar nga lloji i virusit Bundibugyo, për të cilin nuk ka vaksinë apo kurë. Sipas OBSH-së, ka pasur më shumë se 1,900 raste të konfirmuara gjatë shpërthimit dhe më shumë se 700 vdekje të konfirmuara.

Ministria gjermane e shëndetësisë tha se pacienti amerikan nuk përfaqësonte asnjë rrezik për popullatën e përgjithshme ose për pacientët e tjerë në spitalin e Frankfurtit.

“Rreziku që dikush i infektuar me Ebola të hyjë në Gjermani është shumë i ulët”, tha ministria.