I kritikuar për afërsinë me Putin, ish-kancelari Schroder padit Bundestagun

Ish-kancelari gjerman Gerhard Schroder ka paditur parlamentin e vendit, Bundestagun pasi atij iu hoqën disa privilegje shtetërore për shkak të lidhjeve të tij të ngushta me Rusinë.

Schroder, i cili shërbeu nga viti 1998 deri në 2005, kishte humbur të drejtën për financim që merrte më parë për hapësirën e zyrës dhe stafin e tij.

78-vjeçari tani po kërkon të rimarrë përfitimet.

Marrëdhëniet e Schroder-it me kompanitë ruse të energjisë dhe presidentin Vladimir Putin janë vënë nën kritika të ashpra pas pushtimit rus të Ukrainës në shkurt.

Avokati i ish kancelarit tha se klienti i tij kishte paraqitur një padi në gjykatën administrative të Berlinit.

Në maj, Bundestagu gjerman ndryshoi rregullat mbi  disa privilegje që marrin ish-kancelarët në detyrat e tyre aktuale.

Pak ditë më parë  anëtarët e Partisë Social Demokratike (SDP) në pushtet kundërshtuan një kërkesë  për të dëbuar 78-vjeçarin.

 Një komitet në Hamburg deklaroi se ish-kancelari i ka shkaktuar “dëm partisë” por  veprimet e tij nuk kanë shkelur rregullat .

Pas kritikave të forta, Schroder dha dorëheqjen nga bordi i kompanisë ruse të naftës Rosneft në maj dhe tha se kishte hequr dorë nga anëtarësimi në bordin e gjigantit të gazit Gazprom. Por ish-kancelari ka refuzuar të distancohet nga Putini dhe në fund të korrikut  është takuar me liderin rus në një vizitë në Moskë .

LEXONI GJITHASHTU:

• Miliarderi rus guxon të flasë hapur për Putinin