I njohur si “Zot i drogës”, konfiskohen pasuritë e Alket Hatijës

Konfiskohen dhe kalojnë në favor të shtetit pasuritë e Alket Hatijes i etiketuar si “Zoti i drogës”. Me vendim të formës së prerë nga apeli i GJKKO këto pausuri do të kalojnë në favor të shtetit.

Bëhet fjalë për apartamente, garazhe, makina dhe aksione kompanie, që kapin shifra të mëdha monetare. Sipas SPAK, këto pasuri ka dyshime se burojnë nga aktivitete kriminale.

Alket Hatija është shpallur fajtor nga Gjykatës së Shkallës së Parë për Krime të Rënda,  për kryerjen e veprës penale “Trafikim i narkotikëve”, kryer në bashkëpunim, më shumë se një herë.

Njoftimi i SPAK:

Prokuroria e Posaçme kundër Korrupsionit dhe Krimit të Organizuar krahas ushtrimit të ndjekjes penale është kujdesur që të ketë në vëmendje të punës së saj edhe identifikimin, sekuestrimin dhe konfiskimin e pasurive të cilat dyshohen se rrjedhin nga krimi.

Në zbatim të Aktit Normativ Nr.1, datë 31.01.2020 “Për masat parandaluese në kuadër të luftës kundër terrorizimit, krimit të organizuar, krimeve të rënda dhe konsolidimit të rendit e sigurisë publike”, Prokuroria e Posaçme i është drejtuar Gjykatës së Posaçme të Shkallës së Parë për Korrupsionin dhe Krimin e Organizuar me kërkesën për konfiskimin e pasurive të subjektit Alket Hatija (dhe personave të lidhur me të) i deklaruar fajtor  me vendimin nr. 10, datë 26.03.2010, të ish Gjykatës së Shkallës së Parë për Krime të Rënda,  për kryerjen e veprës penale “Trafikim i narkotikëve”, kryer në bashkëpunim, më shumë se një herë, parashikuar nga neni 283/a/2 i Kodit Penal (ky vendim është lënë në fuqi me vendimin nr.966, datë 08.11.2010, të ish Gjykatës së Apelit për Krime të Rënda, Tiranë.

Me kërkesë të Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar me vendimin nr.24, datë 31.10.2023, ndërmjet të tjerave ka vendosur konfiskimin dhe kalimin në favor të shtetit të pasurive si më poshtë:

1. Pasurin e paluajtshme e llojit “truall”, me sipërfaqe 495 m², me adresë Lagjia “Plazh”, Durrës, në pronësi të shtetasit Alket Hatija.
2. Pasurinë e paluajtshme e llojit “truall”, me sipërfaqe 320 m², me adresë Lagjia “Plazh”, Durrës, në pronësi të shtetasit Alket Hatija;
3. Pasurinë e paluajtshme e llojit “garazh”, me sipërfaqe 14.74 m², me adresë Lagjia Nr.13, Plazh, Durrës, në pronësi të personit të lidhur M. H.
4. Pasurinë e paluajtshme e llojit apartament, me sipërfaqe 118 m², me adresë Lagjia nr.1, Rruga “Taulantia”, Durrës, në pronësi të personit të lidhur F.H.
5. Pasurinë e paluajtshme e llojit “apartament”, me sipërfaqe totale 65 m², me adresë Kryemëdhenj, Kavajë, në pronësi të shtetasit F. H.;
6. Automjetin tip autoveturë i markës BMW, prodhim i vitit 2003;
7. 49% të kuotave të subjektit “Aquila Marble” sh.p.k., që i përkasin personit të lidhur M.H.;