I nxehti përvëlues përfshin Evropën: Franca mbyll shkolla, ndizet zjarri në pyje

Franca dhe një pjesë e madhe e Evropës jugore dhe lindore po përballen me një valë ekstreme të të nxehtit, që ka detyruar autoritetet të shpallin një numër rekord alarmesh për temperaturat e larta.

Sipas autoriteteve franceze, 84 nga 96 rajonet kontinentale janë aktualisht nën alarm portokalli për të nxehtin, niveli i dytë më i lartë në sistemin kombëtar të paralajmërimeve. Ministrja e Klimës, Agnès Pannier-Runacher, e ka quajtur këtë një situatë “të paprecedentë”, duke theksuar rrezikun për shëndetin publik dhe infrastrukturën.

Vala e të nxehtit ka detyruar mbylljen e plotë ose të pjesshme të rreth 200 shkollave në të gjithë vendin. Ministrja e Arsimit, Elisabeth Borne, tha se po bashkëpunon me autoritetet lokale për të siguruar mbrojtjen e fëmijëve dhe lejimin e prindërve që t’i mbajnë ata në shtëpi kur është e mundur.

Situata është e ngjashme në disa vende të tjera evropiane. Spanja dhe Portugalia regjistruan fundjavën e kaluar temperaturat më të larta të muajit qershor të matura ndonjëherë:

• 46°C në El Granado, Andaluzi

• 46.6°C në Mora, Portugalia qendrore

Paralajmërime për nxehtësi janë aktive edhe në Itali, Kroaci, Gjermani, Britaninë e Madhe dhe vende të tjera të Ballkanit.

Shërbimet mjekësore emergjente janë vënë në gjendje gatishmërie në shumë prej këtyre vendeve, me autoritetet që bëjnë thirrje për kujdes të shtuar, sidomos ndaj të moshuarve dhe fëmijëve.

Ndërkohë, zjarre pyjore kanë shpërthyer në rajonin jugor të Corbières në Francë, duke detyruar evakuime dhe mbylljen e një autostrade. Zjarrfikësit raportuan se situata është tashmë nën kontroll.