Një 26-vjeçar i shpallur në kërkim nga policia për vrasje është arrestuar nga policia kufitare e Rinasit duke hyrë në territorin e Republikës së Shqipërisë.
Henri Gjapi rezulton i shpallur në kërkim për Vrasje nga pakujdesia. Në një konflikt të ndodhur në muajin mars në zonën e ish-Bllokut ai goditi me grushte 46-vjeçarin Gentian Talja duke i shkaktuar vdekjen.
46-vjeçari ndërroi jetë në spital si pasojë e plagëve të marra.
“Në vijim të punës për kapjen e shtetasve të shpallur në kërkim dhe për vënien e tyre përpara përgjegjësisë penale, shërbimet e Seksionit për Hetimin e Krimeve ndaj Personit, në bashkëpunim me Komisariatin e Policisë Rinas, në hyrje të Republikës së Shqipërisë, si rezultat i analizës së riskut dhe i veprimeve të thelluara gjatë verifikimit të gjenealiteteve të një shtetasi, kanë ndaluar shtetasin: H. Gj., 26 vjeç, banues në Tiranë.
Ky shtetas ishte shpallur në kërkim, pasi Gjykata e Shkallës së Parë e Juridiksionit të Përgjithshëm Tiranë, i ka caktuar masën e sigurisë “Arrest në burg”, për veprën penale “Vrasja nga pakujdesia”.
Më datë 31.03.2023, në rrugën “Vaso Pasha”, shtetasi H. Gj. është konfliktuar me shtetasin G. T., 46 vjeç, i cili për shkak të dëmtimeve është dërguar në spital, për ndihmë mjekësore. Gjatë këtij konflikti, ka ndërhyrë edhe shtetasi A. Gj., i cili ka goditur shtetasin H. Gj. Si pasojë e dëmtimeve, 46-vjeçari ka ndërruar jetë në spital”, njofton policia.
LEXONI GJITHASHTU:
