Ibrahimaj lajmëron paketën e re të mbështetjes sociale: Do të jetë afatgjatë

Ministrja e Financave Delina Ibrahimaj lajmëroi se paketa anti-krizë për mbrojtjen e popullatës nga rritja e çmimeve do të shpallet pas disa ditësh.

Në Komisionin e Ekonomisë ku u diskutua buxheti 2022, Ibrahimaj tha se masat e paketës anti-krizë do zgjasin më shumë se paketa e parë që u nda për 3 muaj.

“Është një mbështetje që synon të jetë më afatgjatë se ajo e mëparshmja dhe do të targetojë kategoritë më në nevojë”, tha ministrja.

Sipas Ibrahimajt, rritja ekonomike për 2022 pritet të jetë mbi 3,2 për qind pasi masat e marra nga qeveria kanë ndikuar në mosuljen e konsumit.

“Rritja ekonomike për vitin 2022 do të jetë më shumë se 3.2%. Parashikimet tona për fundin e vitit 2022, por edhe për 2023 flasin për reduktim të rritjes ekonomike, të ndikuar më së shumti nga frika e uljes së konsumit e ndikuar prej çmimeve. Por deri më tani masat e ndërmarra kanë qenë si mburojë për të mos ulur konsumin. Një nga kostot më të mëdha për këtë vit është rritja e çmimit të energjisë elektrike, dhe ka një buxhet të jashtëzakonshëm prej 28 miliardë lekësh por që ka impakt tek familjet që të mos ulin konsumin”, tha ministrja.

LEXONI GJITHASHTU:

• Paketë e re anti-krizë, ndahen 100 milionë euro deri në dhjetor
• Sulka: Paketat e ndihmës sociale duhet të konsultohen me ekspertët