Identifikohet kufoma e gjetur në Mollas, 75-vjeçari nga Korça rezultonte i humbur

Një 75-vjeçar është viktima e cila është identifikuar nga policia, pasi u gjet pranë stacionit elektrik në fshatin Mollas në Kolonjë.

Kufoma u zbulua nga një banor i zonës, i cili lajmëroi policinë në datën 7 të muajit korrik. Këta të fundit dërguan mostra për kryerjen e analizës së ADN-së dhe po ashtu për ekspertizën antropologjike, për të bërë të mundur identifikimin e kufomës.

Mësohet se ditën e sotme është bërë identifikimi i viktimës, konkretisht një i moshuar 75-vjeçar i cili banonte në qytetin e Korçës. Në qershor të këtij viti, ka qenë bashkëshortja e viktimës që ka kallëzuar pranë komisariatit të Korçës se kishte humbur kontaktet me bashkëshortin e saj.

Pas analizave shkencore u konfirmua edhe identiteti i 75-vjeçarit, i cili dyshohet se vuante nga probleme shëndetësore, konkretisht nga humbja e kujtesës (skleroza), dhe ka ndërruar jetë për shkaqe natyrale në fshatin Mollas të Kolonjës.

Nga ana e policisë së Kolonjës vijon puna për dokumentimin e plotë të ngjarjes.