Kryetari i Bashkisë së Stambollit dhe lideri i opozitës Ekrem Imamoglu tha në reagimin e tij të parë pas arrestimit se populli turk do t’i përgjigjet “gënjeshtrave, intrigave dhe kurtheve” të drejtuara kundër tij.

Imamoglu ndau mesazhin në llogarinë e tij X disa orë pasi u arrestua me akuzat për korrupsion dhe ndihmë për një organizatë terroriste, duke shkaktuar protesta dhe kritika nga opozita, raportoi Reuters.

Autoritetet turke kanë vendosur kufizime në aksesin në mediat sociale, duke përfshirë X, YouTube, Instagram dhe TikTok, pas arrestimit të Imamoglu dhe 100 të tjerëve, tha organizata Netblocks.

Më shumë se 100 persona të tjerë u arrestuan gjithashtu, përfshirë ndihmësin e kryetarit të bashkisë, Murat Ongun.

Menjëherë pas arrestimit, aksionet në bursën turke ranë me shtatë për qind, duke shkaktuar një ndërprerje të përkohshme të tregtimit.

Përveç kësaj, autoritetet turke bllokuan trafikun në disa rrugë në Stamboll dhe ndaluan protestat për katër ditë, për të parandaluar demonstratat e mundshme.

Arrestimi erdhi pasi Imamoglu humbi diplomën dje për shkak të parregullsive të supozuara në lidhje me arsimimin e tij, gjë që e pengon atë të kandidojë në zgjedhjet e ardhshme presidenciale.

Grupi “Netblocks” njoftoi se aksesi në rrjetet kryesore sociale në Turqi ishte bllokuar për të kufizuar përhapjen e informacionit për arrestimin dhe mbështetjen për opozitën.