Importet e produkteve në janar, nafta, birra dhe kafeja shënojnë rritje rekord

Importet e mallrave me akcize si nafta, birra dhe kafeja janë rritur ndjeshëm këtë janar. Rritja lidhet me shtimin e numrit të turistëve, por edhe të furnizimin e grosistëve për të përballuar ndryshimet e çmimeve në tregun global.

Importet e naftës, birrës dhe kafesë kanë arritur nivele të pazakonta këtë janar. Sipas të dhënave të Ministrisë së Financave, importet e naftës u rritën me 15.7%, duke arritur në 53,250 ton, një tendencë e lidhur me rritjen e turistëve dhe investimet infrastrukturore.

Rritja më e madhe u regjistrua te kafeja, me një rritje prej 99% dhe një total prej 723 ton. Ky trend lidhet me luhatjet e çmimit në tregun global, të ndikuara nga ndryshimet klimatike, duke i nxitur grosistët të sigurojnë rezerva më të mëdha.

Birra gjithashtu u importua në sasi të larta, me një rritje prej 35% krahasuar me janarin e kaluar, duke arritur 3,256 ton. Në të kundërt, importet e cigareve ranë me 4.1% këtë vit dhe 29% krahasuar me 2023, që shënoi nivelin më të lartë të dekadës.

Në total, të ardhurat nga akciza u rritën me 13.2% në janar 2025, duke reflektuar rritjen e kërkesës për mallrat dhe strategjitë e grosistëve për të siguruar furnizime në një treg me çmime të luhatshme.

LEXONI GJITHASHTU:

• OKB-ja akordon 110 milionë dollarë për të trajtuar krizat humanitare
• Gjeli i detit i Peqinit, fermeri: Importi na dëmton, ne i rrisim me ushqime organike