Integrimi në BE, ministrja daneze: Nxisim përmbylljen e negociatave me Shqipërinë

Nën presidencën daneze, rruga europiane e Shqipërisë do të nxitet për t’u përmbyllur sa më shpejt. Kështu deklaroi ministrja daneze për Çështjet Evropiane, Marie Bjerre sot, ku theksoi se Danimarka vlerëson objektivin e Shqipërisë për të ecur përpara në rrugën drejt BE-së.

Përgjatë fjalës së së saj në Komitetin e Punëve të Jashtme të Parlamentit Evropian ku prezantoi prioritetet e Presidencës daneze të BE-së, Bjerre u shpreh se, Danimarka nxit të gjitha forcat politike të ndjekin planin ambicioz për mbylljen e negociatave të anëtarësimit.

“Në lidhje me Shqipërinë, ne mirëpresim hapjen e grupkapitujve midis tetorit 2024 dhe majit 2025 duke arritur një numër prej 24 kapitujsh, një rezultat mbresëlënës. Ne vlerësojmë objektivin e Shqipërisë për të ecur përpara në rrugën drejt BE-së dhe nxisim të gjitha forcat politike të ndjekin planin ambicioz për mbylljen e negociatave të anëtarësimit”, tha Marie Bjerre, ministre daneze për çështjet evropiane.

Me tej Bjerre theksoi se pritshmëritë për hapjen e grupkapitujve të tjerë me Shqipërinë janë pozitive.

“Mezi presim të hapim grupkapituj të tjerë negociues në të ardhmen e afërt sapo të përmbushen kushtet. Gjithashtu mezi presim të organizojmë së shpejti konferencën e radhës për anëtarësimin për të hapur grupkapitullin IV për agjendën e gjelbër dhe lidhshmërinë e qëndrueshme”, tha ajo.

LEXONI GJITHASHTU:

• Gjykata Kushtetuese përballet me vakanca, kush janë kandidatët në garë
• Përfundojnë hetimet për ish-deputetin e PS Jurgis Çyrbja, çështja shkon në gjykatë