Interi shtyn festën e titullit, barazon me Torinon

Interi humbi shansin për të shpallur matematikisht titullin kampion këtë javë, pasi u ndal në barazim nga Torino, duke lënë gjithçka të hapur edhe për pak ditë.

Në një formë të shkëlqyer, Marcus Thuram kaloi Interin në avantazh në minutën e 23-të, duke realizuar me kokë pas një krosi të saktë të Federico Dimarcos. Për mbrojtësin italian, ky ishte asisti i 17-të sezonal, një shifër rekord në futbollin italian.

Dimarco vazhdoi paraqitjen e tij të shkëlqyer edhe në pjesën e dytë, duke dhënë një tjetër asist perfekt nga goditja e këndit për Yann Bisseck në minutën e 61-të. Me këtë, ai arriti në kuotën e 18 asistimeve këtë sezon.

Megjithatë, Torino reagoi shpejt dhe përmbysi rrjedhën e lojës. Giovanni Simeone ngushtoi diferencën në minutën e 70-të, ndërsa Nikola Vlasic barazoi shifrat në minutën e 79-të, duke i mohuar Interit festën e parakohshme.

Për të siguruar titullin e 21-të në Serie A, skuadra e drejtuar nga Cristian Chivu do të duhet të presë deri në fundjavën e ardhshme, kur do të përballet në shtëpi me Parmën. Me një epërsi prej 10 pikësh ndaj Napolit dhe vetëm katër ndeshje të mbetura, gjithçka mbetet nën kontroll për zikaltërit.