Teherani hodhi poshtë thirrjen e tre vendeve evropiane duke i kërkuar që të përmbahet nga çdo sulm hakmarrës kundër Izraelit që do të përshkallëzonte më tej tensionet rajonale.
Presidenti iranian i tha kryeministrit të Mbretërisë së Bashkuar se regjimi në Teheran e konsideron hakmarrjen kundër Izraelit për vrasjen e zyrtarit të Hamasit, Ismail Haniyeh në korrik, një të drejtë dhe një mënyrë për të dekurajuar agresionin e ardhshëm.
Presidenti Masoud Pezeshkian, në një bisedë telefonike të hënën vonë me kryeministrin e Mbretërisë së Bashkuar Keir Starmer, tha se një përgjigje ndëshkuese ndaj një agresori është “një e drejtë e kombeve dhe një zgjidhje për ndalimin e krimeve dhe agresionit”, sipas agjencisë shtetërore të lajmeve IRNA.
Heshtja e Perëndimit për “krimin e paprecedentë çnjerëzor” në Gaza dhe sulmet izraelite gjetkë në Lindjen e Mesme ishte “e papërgjegjshme” dhe inkurajoi Izraelin të vinte në rrezik sigurinë rajonale dhe globale, shtoi Pezeshkian.
Presidenti francez Emmanuel Macron, kancelari gjerman Olaf Scholz dhe kryeministri i Mbretërisë së Bashkuar Keir Starmer lëshuan një deklaratë të përbashkët të hënën duke miratuar shtytjen e fundit nga ndërmjetësit Katari, Egjipti dhe SHBA për të ndërmjetësuar një marrëveshje për t’i dhënë fund luftës Izrael-Hamas.
