“Irani po gjuan kot në ajër” gjenerali: Teherani nuk ka arritur t’i përballojë sulmet

Në një lidhje live për Euronews Albania, në emisionin Balkan Talks me Franko Egron, ish-komandanti i Forcës së Sigurisë së Kosovës, gjeneral Kadri Kastrati, u shpreh se Irani nuk ka arritur t’i përballojë të gjitha sulmet që Izraeli dhe SHBA kanë kryer ndaj tij.

Sakaq, Kastrati u shpreh se, edhe pse Irani ka një kombinim të teknologjisë kinezo-ruse, SHBA ka arritur të shkatërrojë zinxhirin komandues ushtarak dhe atë politik, dhe si pasojë e kësaj Irani po sulmon vende të tjera, si Dubai dhe Abu Dabi.

“Objektivat që kanë pasur për qëllim Izraeli dhe SHBA në përgjithësi janë arritur rreth 70% dhe tani do të kemi një fazë të rritjes së intensitetit të tyre, jo vetëm me raketa me rreze të gjatë, por tashmë do t’i kemi edhe aeroplanët amerikanë dhe izraelitë mbi tokën dhe kufijtë e ushtrisë iraniane.

Pa marrë parasysh që ka pasur kombinime të teknologjisë kinezo-ruse, Irani nuk ka arritur as përafërsisht t’i përballojë të gjitha sulmet e fuqishme dhe të furishme të SHBA-së. Por mos harrojmë një gjë, që në minutën e parë SHBA kanë asgjësuar dhe kanë shkatërruar plotësisht zinxhirin komandues ushtarak dhe atë politik të Iranit.

Duket që Irani është duke goditur jo me një planifikim shumë të qartë, jo me caqe që normalisht ushtarakët i godasin, por është duke goditur në Dubai, Abu Dabi dhe përreth shteteve të rajonit të Iranit”, u shpreh Kastrati.