Ish-kryeministri Berisha ‘heq dorë’ nga dietat e Parlamentit

Ish-kryeministri Sali Berisha në një postim në Facebook i ka kërkuar Parlamentit që të tërheqë dietat e paguara për muajin shkurt.

Berisha thotë se zyra e financave në Parlament i ka kredituar në llogarinë bankare shumën prej 75250 lekë, ashtu si dhe për 93 deputetë të tjerë.

Berisha shprehet se “nuk kam patur asnjë dijeni për këto dieta” ndaj i ka kërkuar Parlamentit që t’i “tërheqin ato nga llogaria ime bankare ku i ka derdhur”.

“Unë jam deputet i Qarkut të Tiranës dhe si tillë nuk do pranoj asnjë dietë deri në fund të mandatit. Lëvizjet e mia jashtë Qarkut Tiranë do t’i përballoj me të ardhurat e mia”, shprehet Berisha.

Nisur nga statusi i deputetit, ligjvënësi që nuk banon në qytetin e Tiranës përfiton dieta gjatë kohës që merr pjesë në mbledhjet e Kuvendit, të komisioneve e mbledhjet e grupit parlamentar, ndërsa deputetët që banojnë në Tiranë përfitojnë dieta për ditët e shërbimit jashtë Tiranës.