Ish-kryeministri tunizian dënohet me 35 vjet burg

Një gjykatë në Tunizi dënoi sot ish-kryeministrin Hicham Mechichi me 35 vjet burg për komplot kundër shtetit dhe liderin e partisë islamiste Ennahda, Rachid Ghannouchi, me 22 vjet burg.

Ghannouchi 83 vjeç ka qenë në burg që nga viti 2023 dhe ka marrë dy dënime që arrijnë në pesë vjet në raste të veçanta, ndërsa Mechichi ka jetuar jashtë vendit që nga viti 2021, ku u zhvendos disa muaj pasi Presidenti Kais Saied shpërndau parlamentin.

Gjykata dënoi gjithashtu Lazar Longo, ish-drejtorin e shërbimit të inteligjencës dhe Mohamed Ali Arui, ish-zëdhënësin e ministrisë së brendshme, me 15 vjet burg secili. Kritikët pretendojnë se shumica e liderëve të partive politike në Tunizi u burgosën për të zhdukur opozitën dhe për të konsoliduar pushtetin e Saied, shkruan Reuters.

“Këto janë vendime të padrejta dhe politike që synojnë eliminimin e kundërshtarëve politikë”, tha Moktar Xhmai, një nga avokatët, duke shtuar se ata do të apelojnë vendimet.

Ennahda e quajti gjyqin një shkelje flagrante të pavarësisë së gjyqësorit, duke deklaruar se ishte një sulm i ri ndaj të drejtave dhe lirive. Gjithsej 41 persona, përfshirë disa gazetarë, u akuzuan për komplot kundër shtetit.

Xmai tha se gjykata vendosi një dënim 27-vjeçar ndaj gazetarit Chahrazad Akach, i cili u arratis jashtë vendit dhe dha një dënim me pesë vjet për një gazetar tjetër, Chadi Hajjo Mbarak, i cili tashmë është në burg.

LEXONI GJITHASHTU:

• Mbytet anija me emigrantë në brigjet e Tunizisë, të paktën 12 të vdekur
• Sekuestrohen 400 mijë litra naftë kontrabandë në anijen që vinte nga Tunizia