Izraeli dhe Katari thonë se punojnë për të dërguar ilaçe te pengjet në Gazë

Izraeli dhe Katari po punojnë për të arritur një marrëveshje për dërgimin e ilaçeve te pengjet izraelite që po mbahen nga Hamasi në Gazë, thanë Qeveria izraelite dhe një diplomat më 12 janar.

Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – gjatë sulmit në jug të Izraelit vrau 1.200 persona dhe rrëmbeu afër 240 të tjerë. Ky sulm nxiti luftën në Gazë dhe Izraeli u kundërpërgjigj me një ofensivë të ashpër ajrore, tokësore dhe detare.

Si Hamasi, ashtu edhe Izraeli, kanë shfaqur vullnet që të lejojnë dërgimin e ilaçeve, tha një diplomat, i cili foli në kushte anonimiteti për shkak se negociatat po vazhdojnë.

Palët janë duke biseduar për aspektet logjistike, përfshirë edhe llojin e ilaçeve që janë të nevojshme dhe si të dërgohen ato, tha diplomati.

Zyra e kryeministrit të Izraelit, Benjamin Netanyahu, tha se ka caktuar kreun e shërbimit të inteligjencës, Mossad, David Barnea, që të diskutojë me Katarin për çështjen e ilaçeve për pengjet. Katari ka shërbyer si ndërmjetës me Hamasin në negociatat e mëhershme për lirimin e pengjeve. Përmes një njoftimi, zyra e Netanyahut tha se dërgimi i ilaçeve mund të ndodhë në ditët në vijim.

Diplomati tha se negociatat për marrëveshje erdhën pasi familjarët e pengjeve u takuan me kryeministrin e Katarit dhe ngritën shqetësimin se disa nga familjarët e tyre kanë nevojë për ilaçe.

Gjatë një armëpushimi, afër 100 pengje ishin liruar në këmbim të lirimit të palestinezëve të burgosur në Izrael. Edhe rreth 130 të tjerë, shumica burra, përfshirë edhe 10 që janë mbi moshën 75-vjeçare.

Që kur përfundoi ky armëpushim, Izraeli ka njoftuar se 20 persona kanë vdekur gjatë robërimit, duke bërë që numri i pengjeve të mbetura në Gazë është rreth 110.

Diplomati tha se diskutimet po zhvillohen edhe me organizatat joqeveritare ndërkombëtare lidhur me dërgimin e ilaçeve.

LEXONI GJITHASHTU: 

• Kujt i dedikohet kualifikimi i Kombëtares në Europian? Çfarë mendojnë qytetarët
• EMRI| Prostitucion me vajza të mitura, arrestohet 31-vjeçarja shqiptare në Greqi