Izraeli nuk bën lëshime, Netanyahu: Nuk largohemi nga Gaza, lufta mbaron kur…

Kryeministri izraelit Benjamin Netanyahu insiston se Izraeli do të vazhdojë të kontrollojë kufirin strategjik mes Gazës dhe Egjiptit.

I njohur si Korridori Filadelfia, kufiri ka qenë një pikë diskutimi në bisedimet për armëpushim, përmes të cilave Hamasi i kërkon Izraelit tërheqje të plotë nga Gaza.

Netanyahu thekson se kontrolli i korridorit është jetik për t’u siguruar që Hamas të mos riarmatoset përmes tuneleve.

“Do ta deklaroj të mbyllur luftën në Gaza atëherë kur Hamasi të mos sundojë më atje. Ne po i largojmë ata. Për ta arritur këtë duhet një fitore ushtarake, por edhe një politike për të shkatërruar qeverisjen e tyre”, deklaroi Netanyahu.

Disa mijëra demonstrues mbushën rrugët në Jerusalem dhe Tel Aviv kur trupat e 6 pengjeve u gjetën të vrarë në Gaza. Shumë prej tyre fajësojnë Netanyahun pasi tre prej pengjeve parashikohej të liroheshin në fazën e parë të armëpushimit të propozuar në korrik.

Ndërkohë, presidenti Joe Biden rriti presionin ndaj kryeministrit izraelit dhe e kritikoi atë se nuk po bën sa duhet. Megjithatë, ai mbetet i bindur se palët janë pranë arritjes së një akordi.

LEXONI GJITHASHTU:

• Papa përsërit thirrjen për armëpushim në Gaza
• Ishin rrëmbyer nga Hamasi, gjenden trupat e gjashtë pengjeve izraelitë në Gaza