Izraeli paralajmëron Libanin: Nëse do të ketë luftë SHBA-Iran, Hezbollah-u nuk duhet të përfshihet

Izraeli i ka dërguar një mesazh të tërthortë Libanit se do ta godasë fort Libanin, duke synuar infrastrukturën civile, përfshirë aeroportin, në rast se Hezbollahu përfshihet në ndonjë luftë SHBA-Iran, thanë të martën dy zyrtarë të lartë libanezë.

Zyra e kryeministrit izraelit Benjamin Netanyahu dhe presidenca libaneze nuk iu përgjigjën menjëherë kërkesave për koment.

Ndërkohë, Irani dhe SHBA-të do të zhvillojnë një raund të tretë bisedimesh bërthamore të enjten në Gjenevë, tha të dielën Ministri i Jashtëm i Omanit, Badr Albusaidi, mes shqetësimeve në rritje për rrezikun e konfliktit ushtarak midis kundërshtarëve.

Izraeli i dha goditje të rënda grupit të armatosur të mbështetur nga Irani, Hezbollahut, gjatë një lufte në vitin 2024, duke vrarë udhëheqësin e tij Hassan Nasrallah së bashku me mijëra luftëtarë të tij dhe duke shkatërruar pjesën më të madhe të arsenalit të tij.

Hezbollahu mysliman shiit u themelua nga Garda Revolucionare e Iranit në vitin 1982.

Udhëheqësi i ri i Hezbollahut, Naim Qassem, tha në një fjalim muajin e kaluar se grupi nuk ishte “neutral” në përballjen midis Uashingtonit dhe Teheranit dhe se ishte “në shënjestër të agresionit të mundshëm”.

“Jemi të vendosur të mbrohemi. Do të zgjedhim në kohën e duhur se si do të veprojmë, nëse do të ndërhyjmë apo jo”, tha Qassem.