Izraeli pranon vrasjen e Haniyeh, ministri i Mbrojtjes: Njësoj do ta pësojnë dhe…

Izraeli ka pranuar vrasjen e liderit kryesor të Hamasit, Ismail Haniyeh, verën e kaluar në Iran. Ka qenë ministri i Mbrojtjes, Israel Katz që ka konfirmuar se prapa ekzekutimit qëndron shteti hebre.

Komentet e tij duket se përbëjnë herën e parë që Izraeli pranon përgjegjësinë për vrasjen e Hanijeh, që u realizua në korrik përmes një shpërthimi në kryeqytetin e Iranit, Teheran.

Që atëherë Jerusalemi zyrtar është konsideruar përgjegjës, por liderët hebraikë vetëm sa e kishin lënë të kuptohej përfshirjen e tyre.

Në një fjalim të mbajtur, Katz theksoi gjithashtu se Izraeli ka vrarë edhe liderë të tjerë të Hamasit dhe Hezbollahut, ka ndihmuar në rrëzimin e regjimit të Bashar al Assad dhe se ka shkatërruar sistemet antiajrore të Iranit.

Tani Izraeli është i fokusuar në goditjen e rebelëve Huthi në Jemen, ka bërë të ditur ministri. “Ne do të godasim infrastrukturën e tyre strategjike dhe do t’ia këpusim kokën lidershipit”, ka shtuar ai.

Haniyeh, 62 vjeç, ishte lideri i krahut politik të Hamasit dhe një figurë e rëndësishme e organizatës prej disa dekadash.

Që në korrik, vëzhguesit thanë se vdekja e tij i kishte dhënë një goditje të fortë lëvizjes, në një kohë kur tensionet në Lindjen e Mesme kishin arritur kulmin për shkak të luftës shkatërruese në Gaza.

Gjithashtu, vrasja vuri në dyshim bisedimet e ardhshme për paqen mes grupit militant dhe Izraelit.