“Jam e neveritur”, Meloni reagon ndaj publikimit të fotove në faqen pornografike

Kryeministrja italiane Giorgia Meloni ka reaguar me indinjatë pas zbulimit se imazhet e saj dhe të shumë grave të tjera, përfshirë figura të njohura publike, janë përdorur pa leje dhe janë shpërndarë në faqen pornografike tashmë të mbyllur, Phica.eu.

Meloni e cilësoi këtë akt si “të neveritshëm”, duke theksuar se është një shkelje flagrante e dinjitetit dhe privatësisë së grave.

Në një prononcim për Corriere della Sera, ajo tha:

“Jam e neveritur nga ajo që ka ndodhur. Dua të shpreh mbështetjen time për të gjitha gratë që janë ofenduar dhe dhunuar. Është zhgënjyese të shikosh se në vitin 2025 ende ka njerëz që e konsiderojnë të pranueshme të sulmojnë gratë me fyerje seksiste dhe vulgare, duke u fshehur pas anonimitetit.”

Meloni bëri thirrje për identifikimin dhe ndëshkimin e menjëhershëm të përgjegjësve, duke theksuar se shpërndarja e përmbajtjes private pa pëlqim përbën krim sipas ligjit italian dhe quhet pornografi hakmarrjeje.

Ajo paralajmëroi për pasojat e rënda që publikimi i tillë mund të ketë për jetën personale dhe sociale të viktimave, duke e cilësuar këtë një formë të re dhune digjitale që po përhapet gjithnjë e më shumë.

Kryeministrja u bëri thirrje qytetarëve për ndërgjegjësim, edukim digjital dhe reagim të menjëhershëm në raste të tilla.

Ajo theksoi rëndësinë e raportimit tek autoritetet si Policia Postare dhe Garantuesi i Privatësisë, duke përmendur se vetëdija dhe veprimi janë armët më të mira kundër abuzimeve të tilla.

Në këtë qëndrim është bashkuar edhe motra e saj, Arianna Meloni, duke e dënuar ashpër aktin dhe mbrojtur të drejtën e grave për dinjitet dhe privatësi.

LEXONI GJITHASHTU:

• Meloni akuzon Rusinë: Kremlini po tregon fytyrën e vërtetë
• Nga Uashingtoni, Giorgia Meloni: Ditë e rëndësishme, do shqyrtojmë zgjidhje për paqe